Author name: info@mofzanzibar.go.tz

Naibu Waziri wa Fedha Mhe. Bakari Hamad Bakari amewataka Wakandarasi wanaosimamia miradi mbalimbali ya Serikali kufuata sheria na taratibu zilizowekwa  na Serikali. Kauli hiyo ameitoa wakati alipofanya ziara ya kutembelea Mfuko wa Hifadhi ya Jamii ZSSF na kufanya kikao Ka kamati ya PAC ya Baraza la Wakilishi Amesema mkandarasi ambaye anakwenda kinyume na sheria zilizowekwa na Serikali achukuliwe hatua bila kuonewa huruma huku akiutaka mfuko huo kusimamia nidhamu ya matumizi ya fedha za Serikali. Mwenyekiti wa kamati ya PAC Kombo Mwinyi  Shehe  ameutaka Mfuko wa Hifadhi ya Jamii ZSSF kuangalia Sheria na Miongozo ya utekelezaji wa Miradi inayosimamiwa na Serikali. Amesema ili ufanisi uweze kupatikana ni lazima kuwe na utendaji kazi kwa bidii hasa ukizingatia kuwa taasisi hiyo ni kigezo cha taasisi nyengine. Nae Mkurugenzi Muendeshaji wa Mfuko wa Hifadhi ya Jamii ZSSF Ndg. Nassor Shaaban Ameir, amesema kua mfuko huo utaendelea kusimamia na kutekeleza miradi yake kwa kuzingatia sheria, kanuni na taratibu zilizowekwa ili kuhakikisha kunakuwepo na uwazi, uwajibikaji na ufanisi, pamoja na kuzuia vitendo vya ukiukwaji wa taratibu katika utekelezaji wa miradi hiyo.

Naibu Waziri wa Fedha Mhe. Bakari Hamad Bakari amewataka watendaji wa wizara hiyo kumpa mashirikiano ili kuweza kufanya kazi zake kwa ufanisi. Kauli hiyo ameitoa wakati alipofanya ziara ya kutembelea Ofisi za Wizara ya Fedha na kuonana na wafanyakazi katika Idara na Vitengo tofauti. Amesema ili kuweza kufanya kazi zake vizuri ni lazima kuwe na mashirikino mazuri na wafanyakazi ili kuweza kutatua changamoto zao. Amewataka wafanyakazi hao kufanyakazi kwa bidii na kuweka mbele maslahi ya nchi kuliko maslahi yao binafsi. Hata hivyo amewataka wafanyakazi kupendana, kushirikiana na kuwa wabunifu katika kutekeleza kazi zao. Nao wafanyakazi wa Wizara ya Fedha wameahidi kumpa mashirikiano Naibu Waziri katika kutekeleza kazi zake.

Waziri wa Fedha Zanzibar Mhe. Dkt Juma Malik Akil amesema uhai wa Bodi ya kwanza ya  wakurugenzi ya ZIAAT imepata muelekeo mzuri kwa Nchi  kutokana na wajumbe wake kufanya kazi kwa uweledi, uadilifu na utaalam kwa kuzingatia elimu na Sheria. Dkt. juma Akil ameyasema hayo leo tarehe 03 Oktoba, 2026 katika Ukumbi wa Ofisi za ZURA wakati alipokuwa katika hafla ya kuiaga Bodi ya ZIAAT iliyomaliza muda wake wa miaka mitatu ya utendaji kazi Mhe. Waziri amesema wajumbe wa  Bodi hiyo ni wataalamu wa kiwango cha CPAs walio tukuka ambawo wamefanya kazi kwa viwango vya elimu, ubora na kufuata Sheria jambo ambalo imeifanya taasisi hiyo kuwa na mwazo mazuri na kuleta maendeleo kwa taaluma ya Uhasibu, Ukaguzi na Kodi “kwa hakika  mmefanya kaziI nzuri naamini kipindi kitachofuata watakao kuja wataendea vizuri kwani mmetoa muongozo mzuri utaosaidia masuala ya Fedha na Uhasibui,” alisema Mhe. Waziri wa Fedha Zanzibar Dkt. Juma Akil  aliishukuru Bodi hiyo na wajumbe wake  kwa kusema amepata imani kubwa kuona dhamira ilioundiwa Bodi hiyo imefikiwa.  Nae, Mwenyekiti wa Bodi hiyo CPA Juma A Muhammed alisema kuwa bodi hiyo ilikuwa na wajumbe sita na ilikuwa na kamati tano ambazo ni  kamati ya fedha na utawala, kamati ya Mitihani, kamati ya Nidhamu, kamati ya udhibiti wa ubora na kamati ya ukaguzi. CPA Juma Amour alisema kazi za  bodi hiyo ni pamoja na kutoa elimu kwa wahasibu na wakaguzi na washauri elekezi wa kodi Zanzibar pamoja na kufanya usajili kwa wanachama. Mwenyekiti huyo alishukuru serikali kwa kufanya maamuzi makubwa kwa kujenga taasisi hiyo ambayo ina jukumu muhimu katika kuleta maendeleo na udhibiti wa rasilimali za Nchi  alisema katika kipindi cha miaka mitatu waliweza kujenga mifumo ya usimamizi wa udhibiti ubora wa  taaluma,  usajili wa wanachama, kutoa mitihaniI, kutoa mafunzo ya kitaaluma, usimamizi wa fedha. Aidha, alisema kutokana na hayo Bodi hiyo imeweza kusajili wanachama 844. Bodi ya wakurugenzi ya ZIAAT ilizinduliwa  Novemba 4, 2023 na kumaliza muda wake Oktoba, 03 206.

Serikali ya Mapinduzi Zanzibar imesema itaendelea kuwasimamia wazee ili waishi kwenye mazingira mazuri na kupatiwa mahitaji yote yanayostahiki. Waziri wa Fedha na Mipango Dkt. Juma Malik Akil amesema hayo wakati akifungua kongamano la wazee ikiwa ni kuelekea siku ya wazee duniani. Amesema Serikali imekuwa ikifatilia kwa karibu changamoto zinazowakabili wazee ili kuhakikisha wazee hao wanaishi katika mazingira bora na salama, wazee wamekuwa na mahitaji mengi yanayowakabili hivyo Serikali itaangalia kwa karibu ili kuweza kuyatatua. Aidha amefahamisha kuwa Serikali itaangalia namna ya kuzigatia umri wa uzee kutoka miaka 70 ya sasa na kuwa miaka 60. Hata hivyo amewataka wazee hao kuwa na tabia ya kuangalia afya zao kila baada ya muda ili kuweza kubaini maradhi yanayowasumbua. Nae Katibu wa Jumuiya ya Wazee Wastaafu Bi Salama ameishukuru Serikali kwa kuwaongezea wazee pencheni pamoja na kuanzisha Mabaraza ya Wazee.

Naibu Waziri Wizara ya Fedha na Mipango Mhe. Hamad Omar amefungua Warsha ya Uelewa juu ya Mfumo wa ZanSDI kwa wafanyabiashara wa Zanzibar kupitia Mradi wa BIG-Z. Akifungua warsha hiyo amesema ni sehemu ya mfululizo wa programu endelevu za mafunzo zinazolenga kuwasaidia wafanyabiashara wa ndani. Amesema hatua hii itasaidia kuimarisha ufanyaji wa maamuzi sahihi na kukuza uchumi wa biashara katika nchi yetu ya Zanzibar.

WAZIRI wa Fedha na Mipango Zanzibar, Dk. Juma Malik Akil, ameridhishwa na hatua ya utekelezaji wa miradi ya maendeleo inayotekelezwa Kwa Fedha za Serekali.  Amesema miradi mikubwa ya maendeleo inayotekelezwa kwa fedha za Serikali ni lazima kuzingatia mipango kazi, malipo na muda uliowekwa wa kukamilika. Dk. Akil alisema hayo wakati akizungumza baada ya kufanya ziara ya kukagua miradi mbalimbali ya maendeleo, ikiwemo Mji wa Serikali Kisakasaka, AFCON City, Bandari ya Fumba na Bandari ya Mangapwani, ili kujionea hatua ya utekelezaji wa miradi hiyo. Alisema ufuatiliaji wa karibu wa miradi hiyo ni muhimu katika kuhakikisha fedha zinazotengwa na Serikali zinatumika kwa malengo yaliyokusudiwa na utekelezaji wake ukifanyika kwa kuzingatia viwango, mpango kazi na muda uliowekwa. Aidha alisema  ziara hiyo imelenga  kuhakikisha fedha zinazotengwa na serikali kwa ajili ya miradi ya maendeleo zinatumika kwa malengo yaliyokusudiwa na matokeo yake yanaonekana kwa wananchi. Akizungumzia mradi wa Mji wa Serikali Kisakasaka, alisema unatarajiwa kuwa na majengo ya Wizara mbalimbali za Serikali hatua itakayosaidia kupunguza changamoto ya uhaba wa nafasi za ofisi zinazozikabili taasisi za serikali. Alisema mradi huo, ambao umeanza kutekelezwa katika kipindi cha miezi sita hadi minane iliyopita, unatarajiwa kukamilika ndani ya miezi 24, huku utekelezaji wake ukiwa umefikia takribani asilimia nane. Kwa upande wa AFCON City ya Zanzibar, alisema mradi huo umefikia asilimia 85 ya utekelezaji, kutokana na kuanza kutekelezwa mapema ukilinganisha na baadhi ya miradi mengine. Alibainisha kuwa  mbali na uwanja mkuu, mradi huo unahusisha viwanja vya mazoezi, eneo la kuogelea na jeti itakayowezesha vyombo mbalimbali vya usafiri wa majini kuwafikisha abiria wanaotarajiwa kufika Zanzibar kwa ajili ya michezo.  Mkurugenzi Mkuu wa Shirika la Bandari Zanzibar,  Akif Ali Khamis, alisema Bandari ya Fumba inatarajiwa kukamilisha ujenzi wa gati yake Januari 2027 na kuanza rasmi kutoa huduma Februari mwaka huo, ikiwa na uwezo wa kupokea meli kubwa zenye urefu wa zaidi ya mita 350 na kina cha mita 14.5. Alisema utekelezaji wa ujenzi wa ghati hiyo umefikia takribani asilimia 80, huku mradi mzima ukiwa umefikia asilimia 60, na awamu ya kwanza ya bandari hiyo ikitarajiwa kuwa na uwezo wa kuhudumia takribani makontena 300,000. Alisema uwezo huo utaifanya bandari hiyo  kuwa na nafasi kubwa katika kupunguza msongamano wa mizigo katika Bandari ya Malindi.

Wizara ya Fedha na Mipango imekabidhi kwa Afisi ya Rais Tawala za Mikoa, Serikali za Mitaa na Idara Malumu za SMZ gari za usafi 26 ikiwemo Tipper 15 na Compactor 11 Kwa ajili ya ukusanyaji wa taka ngumu katika Manispaa za Unguja na Pemba. Hafla ya Makabidhiano hayo ilifanyika Ofisi za Wizara ya Fedha na Mipango tarehe 8 September 2026 katika Ukumbi wa Tume ya Mipango na kushuhudiwa na watendaji wa Wizara zote mbili. Ununuzi wa magari haya ulifanyika kupitia taratibu za ununuzi za Mradi wa BIG-Z kwa kuzingatia masharti na taratibu husika za manunuzi za Benki ya Dunia na Serikali ya Mapinduzi ya Zanzibar. Magari haya ni mapya na yanatumia teknolojia ya kisasa ambayo yatasaidia katika usimamizi na udhibiti wa matumizi yake. Kwa mfano: Magari ya Compactor yatafungwa GPS na kamera maalumu kwa ajili ya kufuatilia mwenendo wa matumizi yake na kuimarisha ufanisi wa madereva watakaotumia magari hayo. Akizungumza katika Makabidhiano ya gari hizo, mgeni rasmi Waziri wa Fedha na Mipango Dkt. Juma Malik Akil amesema hana shaka kuwa magari hayo yatatumika kama yalivyokusudiwa kutokana na imani kubwa ya Utendaji na Usimamizi kwa Afisi ya Rais, Tawala za Mikoa, Serikali  za Mitaa na Idara Maalumu za SMZ. Kiujumla gari hizo zimewekewa lengo la ukusanyaji na usafirishaji wa taka, kuboresha usafi wa mazingira katika maeneo yanayohudumiwa na Manispaa, usafirishaji wa vifaa na taka kwenda maeneo maalumu ya utupaji, kusaidia shughuli za usimamizi wa jaa kuu la Kibele na maeneo mengine yanayohusika, kupunguza changamoto ya uhaba wa vitendea kazi katika Serikali za Mitaa na kuimarisha utoaji wa huduma kwa wananchi wa Unguja na Pemba. Dkt. Juma Malik Akil amesema Serikali inalengo la kuweka miji katika hali ya usafi na haiba ya kuvuti Kwa kununua gari maalum za ukusanyaji wa taka ngumu kupitia mradi huu.  Kaimu katibu Mkuu Wizara ya Fedha na Mipango Aboud Hassan Mwinyi amesema jumla ya Bilioni 7 TSh, ndizo zimetumika katika ununuzi wa gari hizo ambazo zimetengenezwa kutoka kiwandani kama toleo la mwaka 2026 chini ya usambazaji wa kampuni za GF Trucks and Equipment Limited ya Dar es Salaam na Kampuni ya GANSU CONSTRUCTION INVESTMENT HEAVY INDUSTRY TECHNOLOGY CO.LTD ya CHINA Nae Mhe. Idrisa Kitwana Waziri wa Nchi Afisi ya Rais Tawala za Mikoa, Serikali  za Mitaa na Idara Maalumu za SMZ ameishukuru  Wizara ya Fedha na Mipango Kwa kukabidhi gari hizo kwani kumekuwa na mahitaji  makubwa ya magari ya ukusanyaji taka katika manispaa   zote za Unguja na Pemba. Wakati huohuo Wizara ya Fedha na Mipango na Wizara ya Tamisemi  ilisaini hati ya  makubaliano ya gari hizo.

Waziri wa Fedha na Mipango Zanzibar, Mhe. Juma malik Akil, akifungua Semina ya pamoja ya siku tatu baina ya MBAA na ZIAAT, tarehe 18 Agosti, 2026 katika ukumbi wa hoteli ya Zanzibar Beach Resort Mazizini, Zanzibar.

WAZIRI wa Fedha na Mipango, Dkt. Juma Malik Akil, amezitaka sekta binafsi nchini kushirikiana kwa karibu na Serikali katika utekelezaji wa Mpango wa Maendeleo wa Zanzibar wa Miaka Mitano wa Awamu ya Pili (ZADEP II), ili kufanikisha malengo ya maendeleo na kukuza uchumi jumuishi. Dk. Akil alisema hayo wakati akizungumza katika mkutano wa kujadili utekelezaji wa ZADEP II  uliowakutanisha viongozi wa Serikali, sekta binafsi, wawekezaji na wadau mbalimbali wa maendeleo, huko Golden Tulip Uwanja ndege Zanzibar. Alisema  ushiriki wa sekta binafsi unapaswa kwenda zaidi ya kuhudhuria mikutano pekee bali ni  kuwa sehemu ya utekelezaji wa mipango ya maendeleo, ambapo  Serikali pekee haiwezi kufikia malengo ya maendeleo bila ushiriki madhubuti wa sekta hizo. Kwa upande wake, Kamishna wa Idara ya Mipango ya Kitaifa na Maendeleo ya Kisekta kutoka Tume ya Mipango Zanzibar Mohemed Masoud Salim alisema Dira ya Maendeleo ya Zanzibar 2050 inalenga kuifikisha Zanzibar katika hadhi ya uchumi wa kipato cha kati cha juu ifikapo mwaka 2050 kupitia maendeleo endelevu na jumuishi. Alieleza kuwa Dira ya Zanzibar 2050 imejengwa katika nguzo nne kuu ambazo ni mageuzi ya kiuchumi, maendeleo ya rasilimali watu na huduma za kijamii, miundombinu na uunganishaji pamoja na utawala na ustahimilivu. Mapema Katibu Mkuu wa Wizara hiyo Dkt. Josephine Rogate  Kimario alisema mkutano huo umelenga kuwakutanisha Serikali na sekta binafsi ili kujadili namna ya kufadhili na kutekeleza Mpango wa Maendeleo wa Zanzibar wa Miaka Mitano wa Awamu ya Pili .